A New Journey
بسم الله الرحمن الرحيم
والصلاة والسلام على أشرف المرسلين سيدنا محمد و على آله و أصحابه أفضل الصلاة والتسليم
ومن تانى تركت حفظ القرأن لانشغالى بأمور الدنيا الفانية و ضعفى مرة أخرى قدام الشيطان و هوايا و تضييع الوقت. و زاد الى ذلك انشغال معلمتى عنى لمدة سنة كاملة فهى لا بتتصل و لا بتسأل ولا بتحرص على تسميعى و كل ما اروح لها أحس انها بتستقبلنى كضيفة و يرجى عدم التكرار!!
وانا اصلا مش عايزه منها حاجة غير تصحيح نطقى و تشجيعى على تكملة الطريق. هى دلوقتى اتغيرت, بس جزاها الله كل خير و الله يبارك لها و يوفقها لإنها السبب بعد إعانة الله فى حفظى لكثير من القرأن. فكانت دايما مرحبة بيا و مشجعة و طالبة منى مجهود اكثر فى الحفظ.
يعلم ربى قد ايه بحبها و أتمنى لها كل الخير و أسأل الله أن يعينها فى أمور دنياها و كبر سنها.
فدلوقتى بعد توهان كثير لمدة سنة و نص بحاول ابدأ من الأول تانى. زرت النهار ده دار تحفيظ و بإذن الله هنبدأ انا و صحبتى منى فى حفظ ربعين كل إسبوع من سورة النساء و مراجعة حزب كامل اسبوعيا من القديم. الله المستعان
المعلمة آيه كانت مرحبة بينا اوى خصوصا لما عرفت ان احن صيادلة. بنتها كمان فى صيدلة أصغر مننا بأربع سنين ووعدناها ان احن هنتعرف عليها فى الكلية و نخليها نشارك معانا فى حاجات فى الجامعة.
طنط آيه جواها حماس جامد جدا ومش متوقهخ مننا أى حاجة أقل من الكم الكبير من الحفظ اللى مطلوب مننا. نظرتها لينا و هى بتقول لنا: هتقدروا؟؟؟ كانت قويه و فيها تحدى و امل فينا. واحن ردينا عليها بكل ثقة: ايوه ان شاء الله هنقدر!!!
خرجنا من عندها كل واحدة فينا مش عارفه تقول ايه من الإحساس اللى جواها. أخيرا حد رحب بينا و هيشجعنا نحفظ القرآن. لأ و بتتحدانا كمان. هو احن نطول!!!
حضنا بعض على السلم ووقفنا كده شويه و كل واحده فى قلبها عارفه انها هتكون رفيقة فى الطريق. لو منى ما حفظتش هتتهزأ مني و لو انا طنشت هاخد على دماغى. ركبنا العربية و قعدنا فى النادى شويه نقرا الجرايد و نتكلم عن حال البلد و مين كان يصدق كبرنا و بقينا بكالريوس؟؟؟ بعد ساعة صلينا الظهر و بعد الصلاة منى حضنتنى تانى يمكن من الفرحة ان النهار ده اول يوم مع بعض على طريق الحفظ للقرآن. انا مش عارفه هى حضنتنى ليه بس ده كان تفكيرى ساعتها. لما قعدنا تانى قولت لها يا منى انا عايزه ألبس عبايات. قالت بجد؟ طب تعالى ألف معاكى على محلات العبايات و تشوفى ايه عجبك و تحفظى اماكن المحلات. اتحمست جدا من سرعة تفكيرها فى التنفيذ, ما ادتنيش فرصة اتردد لحظة!
لفينا لمدة ساعتين و لاقيت حاجات شيك جداً. هو اى نعم العباية بالقليلة 300 جنيه بس شكلها تحفه!! بعدها وصلت منى الصيدلية اللى بتتدرب فيها و سلمت على د. إنجى اللى قعدت تتريق على فرق الطول بينى و بين منى. احن التلاته قلعنا الجزم و قعدنا نقيسفرق الطول بيننا. طبعا الناس اللى فى الصيدلية كانوا متنحين. تلاقيهم كانوا بيفكروا مجانين دول ولا ايه؟ 3 دكاترة حافيين هههههه. ضحكنا شويه و بعد 5 دقايق كنت فى عربيتى و فى طريقى للبيت.
كان يوم جميل اوى. انا كنت محتاجه اليوم ده من زمان. الله يجمع بينى و بين منى على خير و يوفقنا فى حفظ القرأن مع بعض.
يا رب قوينى
hey jannah, rabbena ma3aky ISA. You sound very sincere in your will to learn the quran we 3ashan kida ISA God will help you. keep it up.
Posted by
doshar |
3:27 PM
Doshar, Thank you SO much for encouraging me! I hope God would help us all learn it and understand its meanings isA.
Posted by
Jannah |
8:42 PM